ഇന്ത്യയുടെ മികച്ച പേസ് ബൗളർമാരുടെ ലിസ്റ്റിൽ പലപ്പോഴും കണ്ടിട്ടുള്ള പേരാണ് ഉമേഷ് യാദവിന്റേത്. കരിയറിൽ പരിക്കും ഫോം ഇല്ലായ്മയും പലപ്പോഴും അലട്ടിയപ്പോഴും നല്ല രീതിയിൽ തിരിച്ചുവന്ന പാരമ്പര്യമാണ് ഉമേഷ് യാദവിനുള്ളത്. ഉമേഷ് ഇന്ത്യൻ ടീമിലേക്ക് വീണ്ടും തിരിച്ചെത്താനുള്ള സാധ്യതകളാണ് ഇപ്പോൾ തുറന്നിരിക്കുന്നത്. നിലവിൽ ഇംഗ്ലീഷ് കൗണ്ടി ക്രിക്കറ്റിന്റെ നിറസാന്നിധ്യമായി നിലകൊള്ളുകയാണ് ഉമേഷ് യാദവ്.
കൗണ്ടി ക്രിക്കറ്റിൽ മിഡിൽസെക്സിന്റെ മുൻനിര പേസറായി കളിക്കുന്ന ഉമേഷ് യാദവിന്റെ അഞ്ചുവിക്കറ്റ് നേട്ടം സാമൂഹ്യമാധ്യമങ്ങളിൽ അടക്കം ശ്രദ്ധപിടിച്ചുപറ്റിയിട്ടുണ്ട്. മിഡിൽസെക്സിന്റെ ദർഹത്തിനെതിരായ മത്സരത്തിലായിരുന്നു ഉമേഷ് മിന്നും പ്രകടനം കാഴ്ചവെച്ചത്. 9.2 ഓവറുകളിൽ വെറും 33 റൺസ് മാത്രം വിട്ടുകൊടുത്ത് അഞ്ച് വിക്കറ്റുകളാണ് ഉമേഷ് മത്സരത്തിൽ നേടിയത്.
ഉമേഷിന്റെ ബോളിംഗ് മികവിൽ ദർഹം ടീമിനെ 268 റൺസിന് ഓൾഔട്ടാക്കാൻ മിഡിൽസെക്സിന് സാധിച്ചു. “അഞ്ചു വിക്കറ്റ് നേട്ടം എന്നത് പലപ്പോഴും പ്രത്യേകതയുള്ള ഒന്നാണ്” എന്നായിരുന്നു ഉമേഷ് ഈ വീഡിയോ ഷെയർ ചെയ്ത ശേഷം ഇൻസ്റ്റഗ്രാമിൽ കുറിച്ചത്. മണിക്കൂറുകൾക്കുള്ളിൽ തന്നെ വീഡിയോ ട്രെൻഡിങ് ആവുകയായിരുന്നു.
ഐപിഎല്ലിൽ കൊൽക്കത്ത ടീമംഗമായ റിങ്കു സിംഗ് അടക്കമുള്ളവർ ഉമേഷിന് അഭിനന്ദനപ്രഭാവങ്ങൾ ഇതിന് പിന്നാലെ അറിയിക്കുകയും ചെയ്തു. ഈ വർഷം ജൂണിലാണ് ഉമേഷ് യാദവ് ഇംഗ്ലണ്ടിലേക്ക് പോയത്. ഇന്ത്യ-ഇംഗ്ലണ്ട് ടെസ്റ്റിന് മുമ്പുള്ള പരിശീലനമത്സരത്തിൽ ഉമേഷ് ഇന്ത്യയ്ക്കായി കളിച്ചിരുന്നു. എന്നാൽ മത്സരത്തിൽ ശ്രദ്ധേയമായ പ്രകടനം നടത്താൻ സാധിച്ചില്ല. പിന്നീട് മിഡിൽസെക്സിനായി പല മത്സരങ്ങളും ഉമേഷ് യാദവ് കളിച്ചു.
View this post on Instagram
